كتبت دينا أبو الرب: لا تتبع القطيع

نابلس – الشاهد| كتبت دينا أبو الرب: طلاب جامعة النجاح الوطنية الي بتخرج مهندسين ودكاترة واساتذة ومحاميين وغيره .... بما انّا منحكي عن الفئة المتعلمة الي لازم يكون الوعي دايما مرافقها واخلاقهم ومبادئهم الي بيلتزمو فيها من عمر ١٨ هي الي رح تكمل معهم بشغلهم وحياتهم العملية دون انتماء لاي فصيلة او حزب بس كطالبة هندسة قادرة اميز الصح من الغلط ولما اشوف اشي غلط أقدر اوقف واحكي انه غلط دون خوف او تردد.

 

نحنا أكبر من انه ينشرا تصويتنا بغيابات (كونها حركة داعمة من الجامعة للشبيبة لأنه من مصالح الجامعة تكون الشبيبة بإدارة المجلس واكيد مش من مصالح الطلاب).

 

مواقفهم الي بدا اغلب الطلاب يتناسوها بسبب اكم اعلان او دعاية مثل الصيف الماضي (لما اعتدوا على زملائنا وزميلاتنا بالحرم القديم وعلى الدكاترة من قبل الامن وكانت الشبيبة داعمة للموقف وضد اي طالب بحاول يرفع صوته ليحكي!).

 

زملاء كتير النا بسجون الاحتلال بس بسبب مشاكل شخصية مع افراد هيئة المجلس!.

 

أيام تسكير الطرق والمرمطة على الحواجز لأنه الجامعة ما بدها الدوام يكون الكتروني المجلس ما قدر يعترض او يعمل اي اشي، حتى حكوا الغيابات الموجودة بسبب التسكير رح تنحط بعذر وما صار هالحكي (طبعا حاليا صاروا كلهم بعذر لتحقيق مصالحهم).

 

زملائنا بكلية الطب تعرضوا للضرب داخل الحرم القديم من قبلهم خلال هاد الفصل اثر شجار!.

 

الشهداء الي راحوا والاحداث الي بغزة والناس الي عم تموت مع ذلك كملو بحفلاتهم والرقص والاغاني ولا كانه في عالم عم تبكي دم!.

 

هاد جزء من الكتير بس لا اكتر ولا اقل وحتى لو صار وفازوا بالانتخابات الا انهم ما رح يكونوا ممثلين الي ولا باي شكل من الاشكال ....

 

هاد رايي الشخصي وهاي حقيقة الامور الموجودة بكرر هالحكي مو دعم لحزب معين او انحياز بس مجرد وعي فكري وضميري صوت للحزب الي بدك اياه بس ضلك متذكر انّه صوتك امانة تحاسب عليها واحنا الجيل الي رح يغير والمفروض يكون مقدار الوعي وتدارك المواضيع عنده اكبر.

 

حط صوتك بالمكان الصح بالمكان الي لما تحطه ما حدا ينظلم فيه او اعتزل التصويت.