كتب إيهاب الجريري.. الغلاء فاحش وأدعو حكومة اشتيه للفّة في البلد

الضفة الغربية- الشاهد| كتب الصحفي إيهاب الجريري..

 

معقول ما في حد من الحكومة عمله لفة بشوارع البلد في رمضان، يا إخوان لو بالغلط لو صدفة، اي شي، حد ينزل هيك ويجرب يشتريله أكم من شغلة من أي محل، أواعي أكل اجهزة طناجر كنادر بعيد عنكم... اي شي مش مهم.

 

وهيك يعمله حسبة إذا عيلة من ٤ أو ٥ أشخاص كيف بدهم يمشو حالهم... البلد اسعارها ما طلعت، البلد أسعارها من زمان طالعة بالعالي؛ وصحصح إذا في اشياء زادت شيقل وشقلين يعني قصة كبيرة مش قصة صغيرة.

 

 لأنه شيقل على شيقل بتجمع، والصحيح إنه العيلة بتحتاج كميات من كلشي، يعني الحسبة ما بتصير إنه كيلو كذا طلع شيقل، لأ بدك تقدر العيلة كم كيلو بدها من كذا بالشهر وبالتالي كم بيكون محصلة السعر الي ارتفع على العيلة بالشهر، وهيك...

 

 اعملولكم لفة قبل العيد، روحو أي دكان واي محل اواعي وأي محل حلو وجربو واجهوا الناس الي بتنضاف لصفوف الفقراء والي بيضطروا يطلبوا مساعدة...

 

مش ملاحظين إنه في فئات جديدة بالقصة نساء ورجال كبار بالعمر؟! لوين رايحة البلد؟! عن جد في حد متبع غلاء الأسعار!؟ لأنه الغلا بطل محتمل بالبلد.

 

 اسوأ شي اذا المسؤول بيقيسها على حاله، او حتى بيسأل حد من الي حواليه... معاليك رح يفرجوك البلد جنة، دير بالك في الشارع مش شايفينها هيك ولا شايفينك أساساً.