المستشار الأمني يبلغ الرئيس عن الوضع في جنين..!

جنين – الشاهد| كتب منذر ارشيد: رمضانيات يجعلها خفيفة على سيادته وما يزعل ..!؟ المستشار الأمني ، يدخل مكتب الرئيس في المقاطعة.. ويقول سيادة الر ئيس. .. بعد التحية والإحترام لسيادتك. أريد أن أبلغك عن آخر أخبار محافظة جنين.

الر ئيس .. شو مالها جنين مهي مثل كل محافظات الضفة..شمعنا جنين.!؟

المستشار ..سيادتك انت ما بتعرف. أن جنين مولعة ..!؟

الرئيس .. مولعه يا ساتر يا رب ، شو مين ولعها ، اتصل بإطفائيات رام اللله والضفة كلها شو بيشتغلوا لعاد..!؟.

المستشار…مولعه مش حرائق ولا نار .

الرئيس.. يخرب بيتك ولا شو مولعه، وشو بدك تخبرني ما أنا بعرف كل شيء عنها.

ماشاء الله عليها بلد حلوة وأهلها رايقين والجلمة مفتوحة والتجار. ماشاء الله. حتى بياع العرباية باني دار في المخيم ، وبعدين بكفي فيها محافظ من قباطية بس نسيت إسمه الأول

المستشار ..اسمه الاول كمال.

الرئيس ..مش بقولك بعرفه واسمه الكامل… كمال الشناوي

المستشار .. سيادتك اسمه كمال أبو العرب

الرئيس .. يخرب بيتك ، ولك هذا أسمه الفني ..!؟

المستشار . ماعلينا أنا بدي اخبرك. عن الوضع العام في جنين

الرئيس.. يخرب بيت أهلك انا شو بدي بالعام انا بدي أخبار هاي السنة. العام الماضي ،أنا زرت جنين..!

وانت كنت معي ولا انا غلطان..!؟

المستشار.. سيادتك عمرك مابتغلط بس أنا ما كنت معاك ..!

الرئيس ..مش بقول لك انك ح م بدك تكذبني قوم من هون !؟

المستشار.. لا والله ما قصدت .

الرئيس..طيب هات من الاخر..!.

المستشار..الجيش الإسرائيلي صار له ثلاثة اشهر في جنين وطولكرم والفارعة ، ونابلس عالخفيف تدمير وقتل.

الرئيس ..طيب وطوباس ليش ما بروح عليها. !؟.

المستشار.. طوباس بروح وبييجي فيها.

سيادته ..هيك أخف بلاء.

المستشار.. كلام سيادتك هو الصحيح بلا عن بلا ..بفرق .!!.

الرئيس.. دخلك صار لك ساعة بتبربر.. ما فهمت شو بعملوا بجنين..!؟.

المستشار..إسألني شو ما بعملوا بجنين.

الرئيس. آه صحيح شو ما عملوا.!؟.

المستشار بدهم يهجروا اهلها..!!.

الرئيس…بسيطة ارض الله واسعة

المستشار.. تخيل .. بعملوا كل شيء ولكن تركوا الناس يصلوا التراوييح..!.

الرئيس ..يعني أهل جنين بتروحنوا.

المستشار .. نعم بتروحنوا ..

ولكن أهل جنين ميكلين روح الخل.

الرئيس.. ليش ما عندهم خل .!؟.

المستشار .. عندهم خل بس ما عندهم خبز يغمسوه.

الرئيس ..اليوم بحكي مع غزة يبعتوا لهم سيارة خبز ..!.

المستشار بس سيادتك أهل غزة يا دوب مدبرين حالهم ما عندهم مخابز.

الرئيس.. بعرف ، ولك هاي غزة ، كأنك ما بتعرف أهل غزة.. كلمة واحده لنسوان غزة أخبرهم فيها عن أهل جنين أنهم ما عندهم خبز…!! بتلاقيهن فورا خبزوا عالصاج خبز تنور وبعثوا لحبايبهم في جنين.

المستشار.. هذه فاتتني بس انا مافهت كيف!!؟.

الرئيس .. أنا رتبت أموري. مع أهل غزة. وبس أوصل حدود البلد.. بنبعت لهم سمك دندندنيس وبتذكرني لما نصل رفح ..!!.

المستشار… أذكرك ..ليش أنا رايح معك الى غزة .. !!؟.

الرئيس .. طبعا انت أول واحد رايح معي، هو أنا بستغني عنك ..!؟.

المستشار.. وانا مش مستغني عن روحي ..والله مابروح.

الرئيس..هو على كيفك بحطك بسجن أريحا.

المسشار.. أنا بأمرك. بس بمزح يا ريس..!.

أيوا.. أنا صحيح مدللكم ولكن عند الجد. أنا طخيخ ها.. يالله كمل لي عن جنين شو مالها..!!.

المستشار .. والله اهل جنين زعلانين لأنه ماحدا سائل عنهم.

الر ئيس. وكمال الشناوي شو بيعمل..!؟.

المستشار.. قصدك المحافظ

الرئيس.. أيوا هو هدا ..!!

المستشار ..مشغول بفلمه الجديد ..!؟

الرئيس. .. أيوا صحيح هو كمان ممثل دخلك مين بطلة الفلم..!؟

المستشار .. بُومبه كشرت

الرئيس شو هالإسم هذا أكيد فلم رعب

المستشار. .. نعم سيادتك رعب ورهيب , مهي الممثلة من مخيم جنين.

الرئيس.. طيب وطولكرم كيف حالهم.. حبايبي .!؟

المستشار . على كيف كيفك .

الرئيس يعني اليهود مش مغلبيهم مثل جنين.!؟.

المستشار …مغلبينهم بس عندهم محافظ قبضاي.

الرئيس .. أكيد من قباطية.

المستشار .. اسمه عبد الله.

الريس.. بعرفه حتى اسمه الكامل .. عبد الله كحيل.. سبحان الخالق عيونه مكحله.. وانا عينته في طولكرم لأنه صار له شعبيه بسلفيت.. وهيو بطولكرم شعبيته أكثر .. مش عارف وين أوديه.. والمحافظين بغاروا منه، لانهم ما بيشتغلوا.

المستشار….بس بجد منظم البلد وبوزع مساعدات والكل مبسوط منه.

الرئيس .. انت جاي تقول لي عنه بعرفه عبقري.. ولك. وين ما يروح بشغل الناس كلها معه.. شغل القرود.. ولك إذا الصرصور شغله مراسل عنده.

المستشار.. معقول صرصووور..!!؟.

الرئيس ..هو حكالي.

المستشار .. الصرصور حكى لك..!؟.

الرئيس.. خلصنا ، ولك انت جاي تحقق معي..!؟

المستشار .. عفوا سيادتك ما عاش الي بيحقق معك.

الرئيس.. المهم جنين بكفي أنك طمنتني عليهم أمرهم داحلة وبتروحنوا ..!.

نعم سيادتك بتروحنوا بصلاة التراويح.

الرئيس ..يحمدوا الله أنهم بتروحنوا، في رام الله ما بتروحنوا..!؟.

المستشار.. وبدعولك

الرئيس.. بلاش دجل ، بدعوا لي ولا بدعوا علي..!؟.

المستشار ..فشروا كيف يدعوا عليك ونحن وين رحنا..!؟

الرئيس..شو عرفك..بلكي بدعوا علي بسرهم!؟

المستشار.. حتى لو بسرهم بنعرف..

الرئيس .. كيف بدك تعرف ..!؟

المستشار..إحنا شو بنشتغل يا ريس غير التنسط ،وعندنا أجهزة تنسط بتكشف شو بيفكر الشخص..!؟.

الرئيس ..إذا كان كلامك صحيح

أنا بشو بفكر..!؟

المستشار.. سيادتك بتفكر تخلح صرمايتك وتضربني فيها لأني كذاب.

الرئيس .. يخرب بيتك والله كلامك صحيح

المستشار .. ولو أنا تلميذك يا ريس..!!

تم ترفيع المستشار الى رتبه وزير

مع منحه وسام الاستغلال من الدرجة الممتازة

الرابط المختصر https://shahed.cc/?p=84726