10:18 am 10 سبتمبر 2022

الصوت العالي

كتبت أسماء هريش.. الاعتقال السياسي جريمة ..أين ضمائركم

كتبت أسماء هريش.. الاعتقال السياسي جريمة ..أين ضمائركم

الضفة الغربية- الشاهد| قبل ما تنام! فكر واسأل حالك وضميرك! شو موقفك في الحياة وفي ٨ معتقلين من ٩٧ يوم موجودين في سجن مسلخ أريحا!

 

أسرى محررين بدل ما يتم تكريمهم بعد الافراج عنهم من سجون الاحتلال بتم اعتقالهم ! تخيل بناء على انتماءاتهم الحزبية واعتقالاتهم السابقة لدى الاحتلال ابن بلدك بيعتقلهم وبتفنن بتعذيبهم!

 

تخيل أنه أمهات المعتقلين منهم مضرب عن الطعام لأنه بعد كل المناشدات اللي قدموها للسلطة الفلسطينية و المؤسسات الحقوقية اللي وجودها مجرد ديكور بالبلد، ما ضل غير أمعائهم الخاوية يطالبوا فيها الإفراج عن أبنائهم، واليوم الحجة ثروة إحدى هالأمهات تم نقلها للطوارئ نتيجة تدهور وضعها الصحي بعد اضراب ١٧ يوم من أجل المطالبة بالإفراج عن أبنائها جهاد و سعد وهدان الي أمضوا أكثر من ٨ سنوات في سجون الاحتلال، والأم صار معها ضغط وسكري من رحلة عذاب زيارتها الهم في سجون الاحتلال !

 

انتوا متخيلين كرَم طفل أحمد هريش اللي عمره ثلاث أسابيع شارك بوقفة الأربعاء الماضي أمام محكمة رام الله عشان يطالب بالافراج عن والده لأنه من حقه انه يكون بحضن والده وعشان يطالب بالإفراج عن رفيق والده في المعتقل المحامي أحمد خصيب الي خلال أيام راح يصير أب وتيجي طفلته " منى" على الدنيا!

 

فكر منيح بكل هاي المنظومة اللي البلد حرفياً بسببها واقعة! كل ّ القطاعات بالبلد بسببها يوم عن يوم بتفشل ! لا انت ولا ابنك او أي حدا من عيلتك عارف ياخذ أبسط حقوقه بالخدمات الصحية والتعليمية والاجتماعية….الخ!

 

والأدهى من ذلك إنه هاي المنظومة نفسها ابن فصيلها بيحتضر في سجون الاحتلال بسبب اصابته بالسرطان وتردي وضعه الصحي من أشهر طويلة، وهي أكتر من بيان ومؤتمر صحفي ما بتقدر تعمل وبس بتركب الموجة وبتكسب كم صورة مع والدة الأسير اللي هي خنساء فلسطين وأكبر من انه يتم استغلالها بصورة

 

فكر ثمّ فكر ثمّ فكر ثمّ قرّر أكيد إنت دورك في الحياة أكبر من إنك تاكل وتشرب وتنام

 

بانتظاركم  على دوارة المنارة الساعة 5:30 !

 

#الاعتقال_السياسي_جريمة

كلمات مفتاحية: #الاعتقال السياسي #أسماء هريش #سجن أريحا

رابط مختصر